Сел дар ноҳияи Варзоб

Душанбе, 4 июн. (АМИТ «Ховар», Лутфия Эшонқулова).-Дар натиҷаи боришоти шиддатноки борон ва жола дирӯз дар деҳаи Ҳушёрии ҷамоати деҳоти Варзобқалъаи ноҳияи Варзоб сел омада, ба 3 хонаи истиқоматӣ, мактаби таҳсилоти умумии №3 ва масҷиди деҳаи Ҳушёрӣ обу лойқа даромадааст. Тавре ки ба АМИТ «Ховар» аз маркази матбуоти Кумитаи ҳолатҳои фавқулодда ва мудофиаи граждании назди Ҳукумати ҶТ хабар доданд, сел инчунин кӯпруки байни деҳаро қисман шуста, километри 42-юми шоҳроҳи Душанбе-Хуҷанд ба масофаи 0,5 км ва роҳҳои маҳалии деҳаи Ҳушёриро ба масофаи 4.5 км аз сангу лой пур кардааст. Барои бартараф кардани ҳодисаи баамаломада2 адад техникаи ширкати «АЙРЕС» ва 30 нафар кормандони идораи баистифодадиҳии роҳҳои ноҳияи Варзоб сафарбар гардиданд. Комиссияи ҳолатҳои фавқулоддаи ноҳия дар ҷойи ҳодиса фаъолият дорад.