Вохӯрии Намояндаи доимии Тоҷикистон бо мудири кулли ЮНЕСКО

Душанбе, 5 июн (АМИТ «Ховар).-3 июни соли 2013 дар шаҳри Париж, дар қароргоҳи Созмони Милали Муттаҳид оид ба масъалаҳои маориф, илм ва фарҳанг (ЮНЕСКО) вохӯрии Намояндаи доимии Ҷумҳурии Тоҷикистон дар назди ЮНЕСКО, сафир Рустамҷон Солиев бо мудири кулли ЮНЕСКО хонум Ирина Бокова баргузор гардид. Зимни суҳбат ҷонибҳо масъалаҳои ҳолати кунунӣ ва дурнамои ҳамкориҳои Ҷумҳурии Тоҷикистон бо ЮНЕСКО дар соҳаҳои илм, маориф ва фарҳанг, инчунин татбиқи як силсила лоиҳаҳои робитаҳои дуҷонибаро муҳокима намуданд. Намояндаи доимии Тоҷикистон дар назди ЮНЕСКО Р. Солиев ба мудири кулли Созмон И. Бокова даъватномаи расмии Ҷумҳурии Тоҷикистонро ҷиҳати иштирок дар Конфронси байналмилалии сатҳи баланд оид ба ҳамкорӣ дар соҳаи об, ки августи соли ҷорӣ дар шаҳри Душанбе ба нақша гирифта шудааст, супорид. Мудири кулли ЮНЕСКО омодагии хешро ҷиҳати ба амал овардани боздиди расмӣ аз Тоҷикистон ва иштирок дар кори ин чорабинии муҳими байналмилалӣ изҳор кард.