Қарзҳои хурд ба ноҳияҳои дурдасти куҳистон

Душанбе, 24 июл. (АМИТ «Ховар», Раъно Нусратуллоева).- Бино ба иттилои Бонки миллии Тоҷикистон бақияи қарзҳои низоми бонкӣ 42,7 фоиз афзуда, ба 6,5 миллиард сомонӣ баробар шуд. Таркиби сохтори он аз 38,2 фоизи қарзҳо бо пули миллӣ ва 61,8 фоизи боқимондаи қарзҳо аз асъори хориҷӣ иборат мебошад. Дар нимсолаи аввали соли равон 4,2 миллиард сомонӣ қарз дода шудааст, ки нисбат ба ҳамин давраи соли қаблӣ 43,8 фоиз зиёд аст. Фоизи миёнавазни қарзҳо бо пули миллӣ 24,8 фоиз ва бо асъори хориҷӣ 21,7 фоизро ташкил намуда, нисбат ба нимсолаи аввали соли гузашта бо пули миллӣ 4,7 банди фоизӣ зиёд гардида, бо асъори хориҷӣ 2,5 банди фоизӣ кам шуд. Ҳаҷми қарзҳои пардохташуда ба 3,1 миллиард сомонӣ баробар шуда, коэффитсенти бозгашти он 74,2 фоизи қарзҳои дар нимсолаи аввал дошташударо ташкил намуд.Ҳаҷми қарзҳои хурди додашуда назар ба нимсолаи якуми соли қаблӣ 49,8 фоиз зиёд шуда, ба 2,2 миллиард сомонӣ баробар шуд, ки аз ин ҳисоб ба ноҳияҳои дурдасти куҳистон 444,8 миллион сомонӣ қарзҳои хурд дода шудаанд, ки нисбат ба нимсолаи аввали соли гузашта 43,9 фоиз зиёд мебошад.