Қатъи ваколати се узви ММ МО ҶТ

Душанбе, 5 июл.(АМИТ “Ховар”, Марзия Саидова).-Ваколати се нафар узви Маҷлиси миллии Маҷлиси Олии Ҷумҳурии Тоҷикистон — Гулхоҷа Ҷангибеков, Султон Валиев ва Баҳриддин Солеҳов дар асоси аризаҳои ҳар яке пеш аз муҳлат дар иҷлосияи чордаҳуми палатаи болоии Парлумони мамлакат- Маҷлиси миллӣ қатъ карда шуд. Сабаби пеш аз муҳлат қатъ гардидани ваколати ин вакилон ба кори дигар гузаштан ва иваз намудани ҷойи зисти онҳо арзёбӣ мегардад.  Мавриди зикр аст, ки Гулхоҷа Ҷангибеков қаблан ректори Донишгоҳи Хоруғ, Султон Валиев -собиқ раиси ноҳияи Восеъ ва Баҳриддин Солеҳов собиқ раиси ноҳияи Ҳисор буданд.  Мавриди зикр аст, ки Маҷлиси миллӣ 33 аъзо дошта, тибқи Конститутсияи Ҷумҳурии Тоҷикистон аз чор се ҳиссаи аъзои он аз ҷониби вакилони Маҷлисҳои маҳалли вакилони халқи шаҳру ноҳияҳо, вилоятҳо интихоб карда мешаванд. 8 нафар аъзои Маҷлиси миллиро Президент таъйин менамояд. Шаҳрванди Ҷумҳурии Тоҷикистон, ки синнаш аз 35 болост ва дорои маълумоти олист, ҳуқуқ дорад аъзои палатаи болоии Парлумони мамлакат гардад. Собиқ Президенти Ҷумҳурии Тоҷикистон ҳуқуқ дорад, ки узви доимии Маҷлиси миллӣ бошад. Алҳол, нахустин ва собиқ Президенти Ҷумҳурии Тоҷикистон Қаҳҳор Маҳкамов узви Маҷлиси миллии Маҷлиси Олии Ҷумҳурии Тоҷикистон аст.