Қоҳир Расулзода бо Сафири Украина мулоқот кард

Душанбе, 1 июл. (АМИТ «Ховар»).- Раиси вилояти Суғд Қоҳир Расулзода бо Сафири Фавқулодда ва Мухтори Украина дар Ҷумҳурии Тоҷикистон Виктор Никитюк мулоқот кард.Бар пояи иттилои Хадамоти матбуоти Раиси вилоят зимни сӯҳбат ҷонибҳо сатҳи имрӯзаи ҳамкориҳои дуҷониба ва роҳҳои таҳкими равобити судманд дар ояндаро мавриди баррасӣ қарор доданд. Изҳор гардид, ки Мақомоти иҷроияи ҳокимияти давлатии вилояти Суғд ба рушди ҳамкориҳои минтақавӣ миёни ду кишвари дӯст назари нек дорад. Сафири Фавқулодда ва Мухтори Ҷумҳурии Украина дар Тоҷикистон Виктор Никитюк зикр намуд, ки ки ҷониби Украина низ ба густариши ҳамкориҳои тарафайн бо Ҷумҳурии Тоҷикистон, аз ҷумла ба ҳамкориҳои минтақавии вилоятҳои Винитса ва Днепропетровски ин ҷумҳурӣ бо вилояти Суғд омода буда, дар ин замина, масъалаи таъсиси корхонаи муштарак бо корхонаи «Востокредмет»-и шаҳри Чкалов доир ба истеҳсоли таҷҳизот барои неругоҳҳои хурди барқӣ — обӣ мавриди баррасӣ қарор дорад. Гуфта мешавад, дар ҷараёни мулоқот ҳамчунин масъалаҳои кор бо намояндагиҳои диаспораи украинӣ дар вилоят ва диаспораи тоҷикӣ дар Украина мавриди муҳокима қарор гирифтанд.