Ҳамрохон Зарифӣ ба Зеландияи нав рафт

Душанбе, 8 июл. (АМИТ «Ховар»).-Вазири корҳои хориҷии Тоҷикистон Ҳамрохон Зарифӣ бо сафари расмӣ ба Зеландияи Нав рафт. Бар пояи иттилои Вазорати корҳои хориҷии кишвар ин аввалин сафари сатҳи вазири корҳои хориҷӣ дар таърихи муносбатҳои ду кишвар буда, барои рушди ҳамкориҳои Тоҷикистону Зеландияи Нав заминаи мусоид фароҳам меоварад. Гуфта мешавад, дар доираи ин сафари расмӣ Ҳамрохон Зарифӣ бо собиқ сарвазири Зеландияи Нав ва намояндаи махсуси сарвазири ин кишвар оид ба масоили Осиёи Марказӣ ва ҳамчунин бо Вазири корҳои хориҷии Зеландияи Нав мулоқотҳои дуҷониба анҷом медиҳад. Муносибатҳои дипломатӣ байни Ҷумҳурии Тоҷикистон ва Зеландияи нав моҳи августи соли 1992 барқарор шуда, ҳанӯз заминаи шартномавӣ-ҳуқуқӣ миёни ду давлат вуҷуд надорад.