Ҷамшед Исмоилов Раиси ИАСТ интихоб шуд

Душанбе, 11 июл. (АМИТ «Ховар»).- Дар маҷлиси навбатии Раёсати Иттифоқи арбобони санъати Тоҷикистон овозхони шинохта Ҷамшед Исмоилов Раиси Иттифоқи арбобони санъати Тоҷикистон интихоб шуд. Бар души собиқ Раиси ИАСТ Гулмурод Малиев, ки таъсисдиҳандаи ин созмони ҷамъиятӣ маҳсуб меёбад, вазифаи Раиси иҷроияи он вогузор гардид. Мавриди зикр аст, ки ИАСТ созмони ҷамъиятии навтаъсис буда, ҳадафҳои он мусоидат намудан ба такмили фаъолияти эҷодии арбобони фарҳанг, фароҳам овардани шароиту имкониятҳои баланд бардоштани маҳорати касбӣ баҳри эҳё ва рушду такомули фарҳанги миллии тоҷик, ҳифзу тарғиби ҳамаҷонибаи дастовардҳои санъати мусиқӣ, театр, санъати тасвирӣ, эҷодиёти шифоҳии халқ мебошанд. Айни ҳол ба  ҳайати раёсати ИАСТ офарандагони асарҳои мусиқию драмавӣ — М. Меробов, Қ. Яҳёев, Б. Миралибеков, А. Хоҷаев, Н. Табаров, А. Мӯсоев, Т. Муҳаммадризо, С. Умар, М. Бадалов, Г. Одинева, Б. Мингбоев ва Ҷ. Назриев шомиланд. Дар ҷаласа ҳамчунин дигар масъалаҳои марбут ба таҳкими фаъолияти Иттифоқ, аз ҷумла нашри шумораи навбатии маҷаллаи «Аноҳито», дарёфти имкониятҳои молиявӣ ва захираҳои эҷодӣ ҷиҳати кӯмаку дастгириҳои собиқадорони соҳаи санъату мусиқии касбӣ баррасӣ гардиданд.