Душанбе барои мизбонии Конфронси байналмилалӣ омодагӣ мегирад

Душанбе, 5 июл. (АМИТ «Ховар»).- Имрӯз дар ҳузури Сарвазири Ҷумҳурии Тоҷикистон Оқил Оқилов ҷаласаи Кумитаи тадорукоти омодагӣ ба Конфронси байналмилалии сатҳи баланд оид ба ҳамкорӣ дар соҳаи об -2013 баргузор гардид. Дар ҷаласа оид ба корҳои тайёрӣ ва тадбирҳои дар сатҳи баланд гузаронидани ин чорабинии сатҳи байналмилалӣ ҳисоботи аъзои Кумитаи тадорукот, роҳбарони вазорату идораҳои дахлдори мамлакат шунида шуд. Таъкид шуд, ки ин чорабинӣ, ки бо иштироки намояндагони беш аз сад давлати дунё баргузор мешавад, бояд дар сатҳи баланди ташкилӣ гузаронида шавад. Баргузор гардидани Конфронси байналмилалии ҳаморӣ дар соҳаи об севвумин иқдоми Тоҷикистон аст, ки аз ҷониби СММ дастгирӣ ёфтааст. Қаблан ҳам ин созмони бонуфузи ҷаҳонӣ пешниҳоди Тоҷикистонро дар мавриди эълони соли 2003-юм ҳамчун «Соли оби тоза», солҳои 2005-2015- умро чун «Даҳсолаи амалиёти об барои ҳаёт» пазируфта буд.