Ифтитоҳи Марказҳои омӯзишӣ дар Шоҳмансур

Июль 4, 2013 16:42

Душанбе, 4 июл. (АМИТ «Ховар», Марзия Саидова).- Дар ноҳияи Шоҳмансури Душанбе ду коргоҳи омӯзиши ҳунари дӯзандагӣ ва компютерӣ кушода шуд. Ин марказҳои омӯзишӣ бо ташаббуси Вазорати меҳнат ва ҳифзи иҷтимоии аҳолии ҷумҳурӣ бо кӯмаку дастгирии дафтари намояндагии Кумитаи имдоди имом Хумайнии Эрон дар Тоҷикистон дар ҳамоҳангӣ бо мақомоти ноҳияи Шоҳмансур созмон дода шуда, ҳадафи он фароҳам овардани шароити мусоид ҷиҳати касбомӯзии ҷавонон ва татбиқи сиёсати иҷтимоии Ҳукуматаи Ҷумҳурии Тоҷикистон аст. Дар маросими ифтитоҳи марказҳои омӯзишӣ муовини вазири меҳнат ва ҳифзи иҷтимоии аҳолии ҷумҳурӣ Темур Табаров, раиси ноҳияи Шоҳмансур Самандар Бобоев, раиси дафтари намояндагии Кумитаи имдоди имом Хумайнӣ дар Тоҷикистон Саидмаҳдӣ Ибодӣ, муовини раиси Агентии шуғли аҳолӣ Бобохон Баротов ва директори Муассисаи давлатии «Маркази таълимии калонсолони Тоҷикистон» (МД МТКТ) Алишер Фаромузов ширкат намуда, ташкили марказҳои омӯзиширо қадами устуворе дар роҳи соҳибихтисос гардидани ҷавонон, бахусус ҷавондухтарон ва беҳдошти вазъи иҷтимоии онҳо арзёбӣ карданд. Марказҳои омӯзишӣ бо мошинаҳои дарздӯзӣ, компютер ва дигар таҷҳизоти зарурӣ муҷаҳҳаз буда, дар ҳар як коргоҳ 20- нафарӣ ҷавондухтарон ва писарон тӯли се моҳ ноузукиҳои ҳунари дӯзандагӣ ва асосҳои компютерро аз бар менамоянд. Мавриди зикр аст, ки МД МТКТ ҷиҳати татбиқи сиёсати иҷтимоии роҳбарияти давлат дар ҳамкорӣ бо дафтари намояндагии Кумитаи имдод дар Тоҷикистон аз соли 2011 фаъолияити касбомӯзиро оғоз намуд. Дар ин марказ шаҳрвандони бекасбу ҳунар ва ниёзманд аз рӯи ихтисоси омӯзиши компютер ва дӯзандагӣ ба омӯзиш фаро гирифта, имконият пайдо менамоянд, ки соҳиби касб шуда, вориди бозори меҳнат гарданд. Ба касбомӯзоне, ки баъди хатми омӯзиш мехоҳанд фаъолияти соҳибкориро ба роҳ монанд, бо пешниҳоди лоиҳа аз Вазорати меҳнат ва ҳифзи иҷтимоии аҳолии ҷумҳурӣ ва дафтари намояндагии Кумитаи имдод имкон доранд, ки қарзҳои имтиёзнок гиранд. Дар МД МТКТ талаботи шаҳрвандон нисбати омӯзиши ихтисоси ороишгари мӯй, қаннод, дӯзанда, кафшергар, барқчӣ, , бофанда, таъмиргари автомобил ва асосҳои омӯзиши компютер бештар будааст.

Июль 4, 2013 16:42

Хабарҳои дигари ин бахш

Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Имрӯз дар шаҳри Душанбе ҳаво то 16 дараҷа гарм мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Имрӯз дар водиҳои Тоҷикистон ҳаво 18 дараҷа гарм мешавад
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд