Кишти 11 навъи пахта вобаста ба иқлими минтақа

Душанбе,17 июл. (АМИТ «Ховар”, Фарзонаи Давлат).- Дар 16 ноҳияи вилояти Хатлон 11 навъи пахтаи маҳинах кишт гардидааст, ки 39126 гектарро ташкил мекунад.Тавре аз Академияи илмҳои кишоварзии Тоҷикистон ба АМИТ «Ховар» хабар доданд, навъҳои пахтаи ихтироънамудаи олимони Институти зироаткорӣ вобаста ба иқлими минтақа кишт гардидааст.Ин намудҳо пахтаи “Хуҷанд-67”, «Ирам-1МН», «Хуҷанд-05», «Ориёӣ», “Авесто”, «Сорбон», “Тоҷикистон”, “Неъмат”, Б-70, “ВД-11» ва маҳинахи 9326-В мебошанд, ки дар ноҳияҳои Абдураҳмони Ҷомӣ, Бохтар, Восеъ, Вахш, Ёвон, Фархор, Ҷалолиддини Румӣ, Қубодиён, Носири Хусрав, Хуросон, Данғара, Мир Саид Алии Ҳамадонӣ, Шаҳритус, Сарбанд ва шаҳри Кӯлоб кишт шудааст. Гуфта мешавад, ки вобаста ба иқлими минтақаҳои кишвар дигар навъҳои пахта низ кишт гардидааст, ки 29,7 гектарро ташкил мекунад.