Муҳайё сохтани шароити муосири таълимӣ дар Роғун

Душанбе, 31 июл.(АМИТ «Ховар», Раъно Нусратуллоева).-Бо мақсади дар амал тадбиқ намудани сиёсати давлат дар соҳаи маориф дар шаҳри Роғун 49 мактаби таҳсилоти миёнаи умумӣ фаъолият дорад. Ҳамчунин 2 боғчаи бачагона, як Хонаи кӯдакон, як Маркази эҷодии кӯдакон ва наврасон, гуруҳи мақсадноки омӯзишгоҳи тиббии шаҳри Ваҳдат дар шаҳри Роғун, як Мактаби бачагонаи мусиқӣ ва як Коллеҷи муҳандисию техникӣ фаъолият менамоянд.Зикр кардан бамаврид аст, ки бо мақсади аз вагонхонаҳо баровардани муассисаҳои таълимӣ аз ҷониби мақомоти иҷроияи маҳаллии ҳокимияти давлатии шаҳри Роғун мактаби миёнаи №9-и деҳаи Майдони Нав солҳои зиёд, ки дар вагонхона ҷойгир буд, имсол ба мактаби нави замонавӣ ва дорои шароити муосири таълимӣ кӯчонида шуд. Мактаби мазкур дорои 6 синфхона буда, барои 150 нафар хонанда пешбинӣ шудааст. Тибқи квотаи Президенти Ҷумҳурии Тоҷикистон ба мактабҳои олии касбии ҷумҳурӣ барои таҳсил таввасути озмун дар 10 донишкадаи ҷумҳурӣ 21 нафар (11 нафар духтар) довталаб дохил гардид. Дар ин бора ба хабарнигори АМИТ «Ховар» мутахассиси шуъбаи рушди иҷтимоӣ ва робита бо ҷомеаи дастгоҳи раиси шаҳри Роғун Осиямоҳ Давлатова иттилоъ дод.