Мудирони дорухонаҳои Кӯлоб ҷарима шудаанд

Душанбе, 1 июл. (АМИТ «Ховар», Сулаймон Холов).- Давоми панҷ моҳи соли ҷорӣ дар асоси аризаи мудирони муассисаҳои фарматсевтии минтақаи Кӯлоб 106 номгӯ маводи доруворӣ ва молҳои табиии муҳлати истифодаашон гузашта аз муомилот берун карда шудаанд. Дар ин бора ба хабарнигори АМИТ «Ховар» масъули Хадамоти назорати фаъолияти фармасевтии минтақаи Кӯлоб Нуриддин Валиев иттилоъ дода афзуд, ки айни ҳол дар минтақа 204 адад нуқтаи фурӯши доруворӣ фаъолият намуда, то ин давра 34 адади он аз санҷиш гузаронида шуда, 23 номгӯ маводи дорувории муҳлати истифодаашон гузашта аз муомилот боз дошта шудаанд. Ҳамчунин гуфта мешавад, ки дар рафти гузаронидани ин санҷишҳо ба 8 нафар аз мудирони дорухонаҳо протоколи ҳуқуқвайронкунии маъмурӣ тартиб дода шуда, онҳо ба маблағи 5 ҳазору 800 сомонӣ ҷаримабандӣ шудаанд.