Нақшаи чорабиниҳои 3000-солагии Ҳисор омода мешавад

Душанбе, 19 июл. (АМИТ «Ховар», Дилшодаи Хайруллоҳ) .- Таҳти раёсати Сарвазири мамлакат Оқил Оқилов ҷаласаи навбатии Кумитаи тадорукот оид ба омодагӣ ва гузаронидани ҷашни 3000-солагии Ҳисор баргузор гардид. Дар ҷаласа аъзои кумитаи тадорукот рафти омодагиҳо ба таҷлили ин санаи муҳими таърихиро мавриди баррасӣ қарор доданд.Тавре таъкид гардид дар айни замон нақшаи чорабиниҳои таҷлили ҷашни 3000-солагии Ҳисор таҳия гардида, барои хулосабарорӣ ва тасдиқ ба Ҳукумати Ҷумҳурии Тоҷикистон пешниҳод гардидааст. Мувофиқи нақшаи чорабинииҳо дар ноҳияи Ҳисор ба истиқболи ин санаи таърихӣ сохтмон ва азнавсозии як зумра иншооти муҳим, аз ҷумла бунёди варзишгоҳ барои бист ҳазор ҷойи нишаст, китобхона, осорхона, чойхонаи миллӣ ва як зумра дигар иншооти муҳими соҳаи маорифу тандурустӣ ва фарҳанг ба нақша гирифта шудааст.Сарвазири мамлакат аъзои кумитаи тадорукоти ҷашнро вазифадор кард, ки дар муҳлати кўтоҳ, бо дарназардошти таклифу хулосаҳои асоснок нақшаи чорабиниҳои таҷлили ҷашни 3000-солагии Ҳисорро аз нав дида баромада, барои тасдиқ ба Ҳукумати Ҷумҳурии Тоҷикистон пешниҳод шавад.