Назорати прекурсорҳо дар ҶТ

Душанбе, 29 июл.(АМИТ “Ховар”, Ибодат Давлатова).- Дар Дафтари Созмони Амнияту Ҳамкории Аврупо дар Тоҷикистон дар мавзӯи «Назорати прекурсорҳо барои кормандони полис ва сарҳадчиёни Ҷумҳурии Исломии Афғонистон» тренинги омӯзишӣ ташкил шуд.Тавре ки аз Агентии назорати маводи нашъаовари назди Президенти Ҷумҳурии Тоҷикистон иттилоъ доданд, дар тренинги мазкур аз тарафи кормандони шуъбаи назорати муомилоти маводи нашъаовар ва пешгирии нашъамандии агентӣ ба иштирокчиён дар мавзӯи: «Конвенсияҳои СММ оиди назорати прекурсорҳо», «Назорати прекурсорҳо дар ҶТ», «Намудҳои прекурсорҳо», «Намудҳои ичозатнома ва шаҳодатнома барои воридоти прекурсорҳо дар ҶТ», «Рӯйхати миллии воситаҳои нашъадор, моддаҳои психотропӣ ва прекурсорҳо дар ҶТ», «Самти истифодаи прекурсорҳо дар ҶТ» дарсҳои омӯзишӣ гузаронида шуданд. Инчунин дар дарсҳо асбобҳои техникии аёнӣ истифода шуданд, ки тавассути онҳо ба иштирокчиён намудҳои прекурсорҳо, усулҳои қочок, тарзи нигоҳдорӣ, намунаи иҷозатнома ва шаҳодатномаи воридотӣ нишон дода шуданд.Баргузории чунин дарсҳои омӯзишӣ барои кормандони полиси ҶИА метавонад дар самти пешгирии қочоқи прекурсорҳо ва гардиши ғайриқонунии маводи мухаддир нақши назаррас дошта бошад, зикр намуд манбаъ.