Парлумон ба куҷо мекӯчад?

Душанбе, 17 июл.(АМИТ «Ховар», Марзия Саидова).- Дар назар аст, ки дар оянда бинои Парлумони Тоҷикистон –Маҷлиси Олӣ ба дигар маҳали шаҳр кӯчонида шуда, ин иморат ба яке аз идораҳои давлатӣ дода шавад. Ин матлабро Абдувалӣ Комилов-раиси Агентии сохтмон ва меъмории назди Ҳукумати ҷумҳурӣ имрӯз дар нишасти матбуотӣ ба хабарнигорон ироа кард. Роҳбари ниҳоди масъул ба сохтмон ва меъмории кишвар гуфт, ки алҳол таклифҳо дар мавриди иморати Парлумон батағйир мемонад. Мавриди зикр аст, ки бинои Парлумони Тоҷикистон –Маҷлиси Олӣ дар давоми солҳои 1940-1949 сохта шуда, лоиҳаи он аз рӯи тарҳи меъморон С. Анисимов ва М.Захаров таҳия гардидааст. Ин бино аз лиҳози мавқеи ҷойгиршавиаш ва сохти меъмориву таърихӣ яке аз биноҳои хушнамои Душанбе маҳсуб ёфта, дар хиёбони Рудакӣ, майдони Дӯстӣ ва рӯ ба рӯи муҷассамаи Исмоили Сомонӣ- нахустин поягузори давлати тоҷикон воқеъ аст. Қаблан дар қаноти чапи ин бино вазорати корҳои хориҷии кишвар қарор дошт, ки он дар остонаи ҷашни Наврӯз, 15 март ба бинои нав, воқеъ дар маҳалли Боғи Парчами миллӣ кӯчонида шуд.