Сабабҳои барканории раиси «Шоҳмансур» дар чист?

Душанбе, 16 июл.(АМИТ Ховар, Марзия Саидова).-Зимни ҷаласаи шаҳрдорӣ раиси шаҳри Душанбе Маҳмадсаид Убайдуллоев раиси бозори «Шоҳмансур» Ассомуддин Ризоевро аз вазифа сабукдӯш намуд. Сабаби аз вазифа озод намудани мудири яке аз бозорҳои калонтарини истеъмолии пойтахт риоя нагардидани меъёри нархҳои муқарраргашта нисбати маҳсулоти ниёзи аввал дар моҳи Рамазон арзёбӣ мешавад. Инчунин шаҳрдорӣ дастур додааст, ки дар мавриди аз ҷониби тоҷирону фурӯшандаҳо риоя нагардидани нарҳои муқаррагаштаи маҳсулоти истеъмолӣ онҳо аз истифодаи нуқтаҳои савдо дар бозорҳои пойтахт маҳрум карда шаванд.Ба ниҳодҳои марбута супориш шуда, ки бобати дар моҳи Рамазон таъмин намудани бозорҳои истеъмолии пойтахт бо гӯшти хушсифат ба соҳибкорон маблағ ҳамчун қарзи бефоиз аз буҷаи шаҳр ҷудо карда шавад.