Ш. Раҳматбоев: «Дар 10 сол 70 ҷамъияти саҳомӣ фурўхта шуд»

Душанбе, 31 июл. (АМИТ «Ховар», Бекназари Абӯбакр). — Мутобиқи Нақшаи стратегии хусусигардонии корхонаҳои миёнаю калон ва тағйири сохтори субъектҳои монополияи табиӣ ва корхонаҳои махсусан калон барои солҳои 2003-2013 дар тендерҳои сармоягузорӣ бастаҳои 100 фоизи саҳмияҳои ба давлат тааллуқдоштаи 70 адад ҷамъияти саҳомӣ фурўхта шудаанд. Ин нуктаро 30 июл зимни нишасти матбуотӣ муовини аввали раиси Кумитаи давлатии сармоягузорӣ ва идораи амволи давлатӣ Шуҳрат Раҳматбоев ба хабарнигорон зикр намуд.  Вай афзуд, ки дар маҷмуъ аз соли 2003 то ба ҳолати 1 июли соли ҷорӣ аз 70 адад ҷамъияти саҳомии кушодаи дар тендерҳои сармоягузорӣ фурўхташуда 69 ғолиби тендерҳои сармоягузорӣ шартҳои шартномаҳои хариду фурўши ин ҷамъиятҳоро пурра иҷро намуданд. Ғолибони тендерҳо ба маблағи 85,5 миллион сомонӣ ба иқтидорҳои истеҳсолии корхонаҳои хусусигардонидашуда сармоягузорӣ карда, ба миқдори 3,5 ҳазор адад ҷойҳои нави корӣ ташкил намудаанд, ки ин нишондиҳандаҳо нисбат ба уҳдадориҳои шартномавии гирифтаи онҳо мутаносибан 13 миллион сомонӣ ва 1 083 адад ҷойи корӣ зиёд мебошад.Ҳамзамон дар ин давра 9 адад иншооти соҳаи иҷтимоӣ мансуб ба моликияти ҷумҳуриявӣ дар тендерҳои сармоягузорӣ ба маблағи умумии 3 миллиону 603 ҳазор сомонӣ фурўхта шудаанд. Умуман, аз аввали соли 2012 то ба имрўз 15 адад иншооти соҳаи иҷтимоӣ мансуб ба моликияти ҷумҳуриявӣ дар тендерҳои сармоягузорӣ ба маблағи умумии 8 миллиону 943 ҳазор сомонӣ фурўхта шудаанд. Тибқи шартномаҳои хариду фурўши иншооти мазкур ғолибони ҳамин тендерҳо уҳдадор гардидаанд, ки ба маблағи 4 миллиону 926 ҳазор сомонӣ сармоягузорӣ карда, 105 адад ҷойи нави корӣ ташкил намоянд.