Таҷдиди роҳи нақлиётгарди Душанбе-Чаноқ

Душанбе, 25 июл. (АМИТ «Ховар», Фотима Қувватова). – Имрӯз дар Маркази тадқиқоти стратегии назди Президенти Ҷумҳурии Тоҷикистон нишасти матбуотии марказҳои татбиқи лоиҳаҳои инвеститсионӣ шуда гузашт, ки дар он директори Маркази идоракунии лоиҳаи “Рушди деҳот” Ғоиб Давлатов, муовинон ва хабарнигорони ВАО иштирок доштанд.Дар нишасти мазкур оид ба таҷдиди роҳи нақлиётгарди Душанбе-Чаноқ ва татбиқи лоиҳаи мусоидат намудан дар рушди иҷтимоӣ ва иқтисодии қисматҳои ҷанубу шимоли Ҷумҳурии Тоҷикистон, ҷиҳати таҷдид ва барқарор намудани роҳи Душанбе-Хуҷанд-Бӯстон-Чаноқ, нақби Шаҳристон, сохтмони долонҳои зидди тарма, кӯпрукҳо ва дигар иншооти ёрирасон суханронӣ шуд. Зикр шуд, ки арзиши умумии лоиҳаи роҳи автомобилгарди Душанбе-Чаноқ, ки бо сохтмони нақби “Шаҳристон” 295,9 млн.долл. ИМА-ро ташкил медод, мувофиқи санадҳои тасдиқшудаи лоиҳавию нархномавӣ иншоот ба маблағи 216 млн. 100 ҳазор доллари ИМА ба истифода дода шудаанд. Ягона иншооте, ки дар доираи татбиқи лоиҳа боқӣ монда буд ва корҳои сохтмонӣ дар он ба анҷом расонида шудаанд, ин нақби “Шаҳристон” мебошад. Дарозии нақби автомобилгарди он 5253 метр ва ҳаводиҳанда 5289 метр буда, арзиши он 88 млн. 424 ҳазор доллари ИМА-ро ташкил медиҳад.