Таҷлили ҷашни 85-солагии Хадамоти давлатии оташнишонӣ

Душанбе, 31 июл. (АМИТ «Ховар», Лутфия Эшонқулова).-Маҷлиси тантанавӣ бахшида ба 85-солагии Хадамоти давлатии оташнишонии Вазорати корҳои дохилӣ бо иштироки роҳбарияти вазорат, кормандон ва собиқадорони соҳаи оташнишонӣ дирӯз дар Душанбе баргузор гардид.Тавре ки сомонаи расмии ВКД хабар медиҳад, дар ҷаласа вазири корҳои дохилӣ Рамазон Раҳимов зикр намуд, ки «Хадамоти оташнишонӣ яке аз самтҳои муҳими мақомоти корҳои дохилӣ маҳсуб ёфта, барои наҷот додани молу ашёи мардум масъулияти бузург ба дӯш дорад. Хадамоти мазкур соли 1930 таъсис ёфта, дар солҳои ҶБВ ду нафар кормандони ин хадамот бо унвони Қаҳрамони Иттиҳоди Шӯравӣ мушарраф гардидаанд. Истиқлолияти Ҷумҳурии Тоҷикистон ба фаъолияти мақомоти корҳои дохилӣ нерӯи тозае бахшида, ба рушду инкишоф, фароҳам овардани шароити моддию техникӣ, интихоби кадрҳои ботаҷриба ва беҳдошти вазъи хизмат мусоидат намуд. Вазифаи Хадамоти оташнишонӣ ҳифзи моликияти мардум ва корхонаҳои давлатӣ аз сӯхтор мебошад. Бояд зикр кард, ки дар 6 моҳи соли равон дар миқёси ҷумҳурӣ 678 ҳодисаи сӯхтор ба қайд гирифта шудааст, ки маблағи зарари расида аз сӯхтор беш аз 6 миллион сомониро ташкил медиҳад.Маҳз ранҷу заҳмат ва ҳисси масъулиятшиносии кормандони Хадамоти давлатии оташнишонӣ буд, ки дар ин муддат молу амволи шаҳрвандон ба маблағи зиёда аз 165 миллион сомонӣ аз нобудшавӣ эмин нигоҳ дошта шуда, 198 нафар аз коми оташ наҷот дода шуд.