Ташкили коргоҳҳои дӯзандагӣ дар Муъминобод

Муъминобод, 26 июл. (АМИТ «Ховар», С. Холов).-Бо максади ба касбомӯзӣ фаро гирифтани сокинон дар ноҳияи Муъминобод ташкилоти ҷамъиятии «Маркази рушди соҳибкорӣ» фаъолият мекунад, ки дар давоми панҷ сол тавонистааст шумораи зиёди сокинони ноҳияро соҳибкасб намояд. Дар ин марказ ба хоҳишмандон касбҳои дӯзандагӣ, қаннодӣ, устои мошинҳои сабукрав, дуредгарӣ ва кафшергари газию барқӣ омӯзонида мешавад. Ба курсҳои дӯзандагӣ занону духтарони синни гуногун муроҷиат мекунанд ва дар муддати се моҳ касби дӯзандагиро аз худ намуда, коргоҳҳои хурди дӯзандагӣ ташкил менамоянд. Дар айни замон дар ноҳия якчанд коргоҳи хурди хизматрасонӣ фаъол гардида, дар онҳо хатмкардагони маркази мазкур кор мекунанд. Роҳбарияти ташкилоти ҷамъиятии «Маркази рушди соҳибкорӣ» бо таҳияи барномаҳои нав мақсад доранд, омӯзиши касбҳои дигарро ба роҳ монанд, то шумораи бештари сокинон ба касбомӯзӣ ҷалб шаванд.