Ташрифи ҳайати ВКД Қирғизистон ба Тоҷикистон

Душанбе, 22 июл. (АМИТ «Ховар», Лутфия Эшонқулова).-Муовини аввали вазири корҳои дохилӣ Нурилло Орипов бо ҳайати намояндагони Вазорати корҳои дохилии Ҷумҳурии Қирғизистон, ки бо роҳбарии муовини вазири корҳои дохилии ин кишвар Курсан Асанов ба Тоҷикистон ташриф овардаанд, мулоқот доир намуд.Тавре ки сомонаи расмии ВКД хабар медиҳад, бо назардошти он, ки дар айни замон ҳам дар Вазорати корҳои дохилии Тоҷикистон ва ҳам дар Вазорати корҳои дохилии Қиғизистон ислоҳоти милитсия ҷараён дорад, яке аз масъалаҳои асосии мулоқот ин баррасии ҷараёни ислоҳоти милитсия дар ВКД Тоҷикистон буд. Оид ба ҷараёни ислоҳоти милитсия ва корҳои анҷомдодашуда муовини сардори Раёсати ҳамкориҳои байналмилалӣ, полковники милитсия З. Солиева муфассал сухан гуфта, вазифаҳо ва афзалиятҳои «Стратегияи ислоҳоти милитсия ва роҳҳои амалисозии он»-ро ба ҳамкорони қирғиз шарҳ дод.