Ташрифи Р. Раҳимов ба кӯдакистон

Душанбе, 11 июл. (АМИТ «Ховар», Ибодат Давлатова).- Дирӯз Вазири корҳои дохилии Тоҷикистон Рамазон Раҳимов ба кӯдакистони «Табассум»-и ВКД ташриф овард ва аз шарту шароит, ошхона, ҷойи хоб, ҷои бозӣ ва ҷойи хӯрокхӯрии кӯдакон дидан намуда, ба онҳо яхдон, мизу курсӣ, маводи хӯрокворӣ ва бозичаҳои гуногун тӯҳфа намуд.Тавре ки аз ВКД ба АМИТ «Ховар» иттилоъ доданд, Вазири корҳои дохилӣ ҳангоми вохӯрӣ ба роҳбарият ва мураббиёни Кӯдакистони мазкур таъкид намуд, ки пайваста ба кӯдакон ғамхорӣ зоҳир намуда, ба хӯрок, тозагӣ ва саломатии онҳо диққати махсус диҳанд. Ҳамзамон, Рамазон Раҳимов ба роҳбарияти Кӯдакистон ва сардори Раёсати сохтмони асосии Вазорати корҳои дохилӣ оиди таъмир намудани саҳни ҳавлӣ ва боз ҳам беҳтар намудани шароити Кӯдакистон дастуру супоришҳои мушаххас дод. Кӯдакистони «Табассум»-и Вазорати корҳои дохилӣ айни замон 226 нафар кӯдакони аз синни 3-сола то 7-соларо фаро гирифта, дар ин кӯдакистон машғулиятҳо бо забонҳои тоҷикӣ, русӣ ва англисӣ гузаронида мешавад.