Қ. Расулзода бо аҳли маорифи Суғд мулоқот кард

Душанбе, 29 август. (АМИТ «Ховар», Баҳманёр Муродов ).-Дар қасри Арбоби шаҳри Хуҷанд машварати августии омӯзгорони вилояти Суғд баргузор гардид, ки дар он раиси вилояти Суғд Қоҳир Расулзода сухан гуфт. Бар пояи иттилои Хадамоти матбуоти раиси вилоят Қоҳир Расулзода кормандони соҳаи маорифро бахшида ба фарорасии Рӯзи дониш, оғози соли нави таҳсил ва ҷашни Истиқлолияти давлатии Ҷумҳурии Тоҷикистон табрик гуфта, баъдан рушди соҳаи маорифро асоси пешрафти ҷомеа ва иқтисоди кишвар арзёбӣ намуд. Ба таъкиди раиси вилоят дар давоми солҳои 1992-2012 ва шаш моҳи соли равон дар миқёси вилоят беш аз 400 муассисаи таҳсилоти умумӣ бо 100 ҳазор ҷои нишаст ба истифода дода шудааст ва дар айни замон сохтмони 69 иншооти маориф барои 13 ҳазору 700 ҷои нишаст бо маблағи умумии 102 миллион сомонӣ идома дорад. Ҳамчунин раиси вилоят аз вазъи компютеркунонии мактабҳо изҳори нигаронӣ кард, ки сатҳу сифати таълиму тарбия, дараҷаи маърифатнокӣ ва малакаву маҳорати хонандагони муассисаҳои алоҳидаи таҳсилоти миёнаи умумӣ ба талаботи меъёрҳои муосир пурра ҷавобгӯ намебошад. Гуфта мешавад, дар анҷом ба 30 нафар устодони фаъоли макотиби шаҳру навоҳии вилоят сипопосномаҳои мақомоти иҷроияи ҳокимияти давлатии вилояти Суғд ва туҳфаҳои пулию хотиравӣ супорида шуд.