Ҷаласаи тадорукот оид ба ҳамкорӣ дар соҳаи об

Душанбе, 1 август.(АМИТ «Ховар»).- Имрўз дар ҳузури Сарвазири Ҷумҳурии Тоҷикистон Оқил Оқилов ҷаласаи панҷуми Кумитаи тадорукоти омодагӣ ба Конфронси сатҳи баланд оид ба ҳамкорӣ дар соҳаи об-2013 баргузор шуд.  Оқил Оқилов изҳор дошт, ки дар айни замон дар мамлакат барои дар сатҳи зарурӣ гузаронидани ин чорабинии муҳим, ки аҳамияти ҷаҳонӣ дорад, тамоми тадбирҳо андешида шуда, ҷараёни омодагиҳо мувофиқ ба нақша идома дорад. Аъзои кумитаи тадорукот ва роҳбарони вазорату идораҳои дахлдори мамлакат вазифадор карда шуданд, ки раванди бақайдгирии иштирокчиёни конфронсро тезонида, шумораи ҳайатҳои давлатҳои иштирокчиро дақиқ намоянд ва барои таҳия ва тасдиқи рўзномаи корӣ ва мавзуъҳои дар конфронс муҳокимашаванда тадбирҳои зарурӣ андешанд. Хотиррасон бояд кард, ки баргузории Конфронси сатҳи баланд оид ба ҳамкорӣ дар соҳаи об-2013 дар шаҳри Душанбе даҳаи сеюми моҳи августи соли равон дар назар дошта шудааст.