Беш аз 700 сокини Душанбе аз “Ховарон” замин мегиранд

Душанбе, 20 август.(АМИТ “Ховар”, Марзия Саидова).- 712 нафар сокини эҳтиёҷманди пойтахт дар маҳаллаи “Ховарон”, воқеъ дар шарқи Душанбе соҳиби қитъаи замин мегардад. Тақсимоти замин ба сокинон тибқи қуръапартоӣ 27 август ҷараён мегирад. Мавриди зикр аст, ки аз ҷониби Раёсати сохтмони асосии шаҳри Душанбе ҳамчун фармоишгар лоиҳакашӣ ва сохтмони хатҳои муҳандисии беруна, роҳҳо, ирригатсия, обтаъминкунӣ, корезӣ, барқтаъминкунии қасабаҳои 14 ва 15-уми маҳаллаи “Ховарон” оғоз гардидааст. Ҳамзамон масъалаи ҷудо кардани ҳудуди 727 қитъаи замин ва нишонагузории он феълан тибқи дастури шаҳрдор аз ҷониби Кумитаи заминсозӣ ва Сарраёсати меъморӣ ва шаҳрсозии шаҳри Душанбе идома дорад. Дар робита ба ин дар ҷаласаи сайёри шаҳрдорӣ, ки дар он масъулини сохторҳои марбутаи шаҳр ҳузур доштанд масъалаи ба сокинони эҳтиёҷманд додани қитъаи замин матраҳ гардид. Ҷиҳати таъмини волоияти қонун ва адолати иҷтимоӣ дар масъалаи тақсими замин ва ҷилавгирӣ аз тақаллубкориҳо раиси шаҳри Душанбе ба масъулини сохторҳои шаҳрию ноҳиявии мақомоти ҳифзи ҳуқуқ дастур додааст, ки то 23 августи соли равон санҷиши дақиқи рӯйхатҳоро ба анҷом расонида, хулосаҳояшонро ба унвонии раиси шаҳр ироа созанд. Интизор меравад, ки ба 712 нафар сокини пойтахт дар масоҳати 3 садякӣ замин барои истифодаи бемуҳлат ҷиҳати сохтмони хонаҳои истиқоматии инфиродӣ дар доираи Нақшаи генералии тарҳрезишуда тақсим мешавад.