Чорабинии оммавии зиддимухаддиротӣ дар ВМКБ

Душанбе, 6 август. (АМИТ «Ховар», Ибодат Давлатова).- Аз 3 то 5 августи соли ҷорӣ дар Қасри фарҳанги ноҳияи Ишкошим ва маҳаллаи «Тем»-и шаҳри Хоруғ бо иштироки доираи васеи аҳолии минтақаҳои наздисарҳадӣ чорабинии оммавию фарҳангӣ ва таблиғотии зиддинашъамандӣ баргузор гардид.Тавре ки аз Агентии назорати маводи нашъаовари назди Президенти Ҷумҳурии Тоҷикистон иттилоъ доданд, дар чорабинӣ кормандони агентӣ дар якҷоягӣ бо намояндагони мақомоти иҷроияи ҳокимияти давлатии ноҳия ва шаҳри Хоруғ, мутахассисони соҳаҳои тандурустӣ, маориф, инчунин ҳунармандони маъруф ва варзишгарони номии ҷумҳурӣ ба ҳозирин барномаи пурғановати фарҳангӣ, таблиғотӣ ва варзишӣ пешниҳод карданд. Ҳамзамон барои иштирокчиён варақаҳои иттилотӣ ва буклетҳои зиддинашъамандӣ тақсим карда шуд. Иинчунин идомаи чорабинии мазкур дар ҳудуди бозорҳои байналмилалии «Ишкошим»-и ноҳияи Ишкошим ва «Тем»-и шаҳри Хоруғ, ки барои хариду фурӯши маҳсулоти мавриди талаботу ниёзи аҳолии ноҳияҳои наздисарҳадии Ҷумҳурии Тоҷикистон ва Ҷумҳурии Исломии Афғонистон истифода мешавад, доир гардид. Бояд гуфт, ки дар байни иштирокчиёни чорабинии мазкур, аз ҷумла намояндагони мақомоти сарҳадӣ ва ҳифзи ҳуқуқи ду кишвар, соҳибкорони инфиродӣ ва аҳолии маҳаллӣ корҳои таблиғотӣ гузаронида шуданд. Ба онҳо варақаҳои иттилоотӣ ва буклетҳои таблиғотии бо забонҳои тоҷикӣ ва дарӣ таҳияшуда, ки дар бораи оқибатҳои нашъамандӣ ва нашъаҷаллобӣ, пешгирии нашъамандӣ маълумоти муфассал доштанд, дода шуданд.