Кўмаки инсондўстона дар моҳи рамазон

Душанбе, 7 август. (АМИТ «Ховар», Ибодат Давлатова).- Дирўз, дар арафаи Иди саиди Фитр аз тарафи роҳбарияти Хадамоти муҳоҷирати назди Ҳукумати Ҷумҳурии Тоҷикистон ба Литсей-интернати касбии махсуси маъюбони Вазорати меҳнат ва ҳифзи иҷтимоии аҳолии Ҷумҳурии Тоҷикистон кўмаки хайриявӣ, аз қабили маводи ғизоӣ, орд, равған, шакар, макарон, сабзавот расонида шуд.Тавре ки аз хадамоти мазкур иттилоъ доданд, чунин амали неку савоб аз ҷониби роҳбарияти Хадамоти муҳоҷират ба таври доимӣ сурат мегирад. Дастгирии моддӣ ва кўмак ба эҳтиёҷмандон ва маъюбон дар кишвар ба ҳукми анъанаи нек даромада, боиси хурсандӣ ва хушҳолии табақаи эҳтиёҷманд мегардад. Хадамоти муҳоҷирати назди Ҳукумати Ҷумҳурии Тоҷикистон минбаъд низ ин гуна амалҳои некро идома хоҳад дод, зикр намуд манбаъ.