Медали ЮНЕСКО барои Президенти Тоҷикистон

Душанбе, 21 август. (АМИТ «Ховар»). – 20 август директори генералии ЮНЕСКО Ирина Бокова ба ифтихори 60 –умин солгарди таъсисёбии ЮНЕСКО медали ин созмони ҷаҳониро ба Президенти Тоҷикистон Эмомалӣ Раҳмон супурд. Назар ба гуфтаи Ирина Бокова, дар ҷараёни мулоқот бо Президенти кишвар доираи васеи масоили марбут ба ҳамкории миёни Тоҷикистон ва ЮНЕСКО мавриди муҳокима қарор гирифтанд. Ирина Бокова ҳамчунин зикр намуд, ки медали ҷашнӣ ба нишони фаъолияти самараноки Эмомалӣ Раҳмон барои рушду густариши ҳамкорӣ дар ҳошияи Соли байналмилалии ҳамкорӣ дар бахши об ва 20 – солагии ҳамкории Тоҷикистон ва ЮНЕСКО ба ӯ супурда шуд.Дар ҷараёни мулоқот ҷонибҳо зикр намуданд, ки тайи 20 соли ҳамкории байни Ҷумҳурии Тоҷикистон ва ЮНЕСКО дар Тоҷикистон силсилаи лоиҳаҳои бахши илми маориф, ҳифзи ёдгориҳои таърихӣ ва ғайра дар амал татбиқ шуданд. Мусоҳибон ба феҳрасти Мероси умумиҷаҳонии ЮНЕСКО ворид шудани шаҳраки қадимии Саразм, Боғи миллии «Кӯҳҳои Помир» — и Тоҷикистон ва иншоотҳои дигарро бо камоли хушнудӣ иброз доштанд.