Мулоқоти Шералӣ Ҷононов бо Муҳаммад Зубайр

Душанбе, 1 август. (АМИТ «Ховар»).- 30 июли соли 2013 Сафири Фавқулодда ва Мухтори Ҷумҳурии Тоҷикистон дар Ҷумҳурии Исломии Покистон Шералӣ Ҷононов бо раиси Шӯрои сармоягузории Покистон Муҳаммад Зубайр мулоқот намуд. Дар вохӯрӣ мубодилаи афкори манфиатнок оид ба рушди муносибатҳои дуҷониба бар таъкиди ривоҷи заминаи шартномавӣ-ҳуқуқӣ дар партави узвияти Тоҷикистон дар Созмони Умумиҷаҳонии Савдо, дастгирии сармоягузорӣ ва рушди лоиҳаҳои муштарак, пеш аз ҳама дар соҳаи энергетика, рушди инфрасохторӣ, кишоварзӣ ва тиҷорат сурат гирифт. Шӯрои мазкур дар тобеияти бевоситаи Сарвазири Покистон буда, ба доираи ваколати он ташвиқ ва тавсеяи сармоягузорӣ ба иқтисоди Покистон, беҳдошти ҳавасмандгардонии сармоягузорӣ, коркарди расмиёти соддаи ҳамоҳангсозии байниидоравӣ, баланд бардоштани мавқеи бахши хусусӣ дар рушди соҳаҳои саноат ва ғайра дохил мешаванд.