Шаҳрвандони Тоҷикистон дар урдугоҳи муваққатӣ

Душанбе, 13 август. (АМИТ «Ховар»). – Вазорати корҳои хориҷии ҷумҳурӣ хабар медиҳад, ки вазъи шаҳрвандони Тоҷикистон, ки дар ҷараёни тафтиши Хадамоти федералии муҳоҷирати Русия дар шаҳри Маскав ва вилояти Маскав бинобар халалдор сохтани қоидаҳои буду бош дар Федератсияи Русия дастгир шуда буданд, таҳти назорати доимии Сафорати Тоҷикистон дар ин кишвар қарор дорад. Чанде пеш кормандони масъули Сафорат аз урдугоҳи муваққатии муҳоҷирони меҳнатӣ воқеъ дар ноҳияи Голяновои вилояти Маскав, ки дар он 10 нафар шаҳрвандони дастгиршудаи Тоҷикистон қарор доранд, боздид намуданд. Дар ҷараёни сӯҳбат бо шаҳрвандони зикршуда сабабҳои дастгир шудан ва проблемаҳои онҳо мавриди муҳокима қарор гирифтанд.Алҳол кормандони масъули Сафорати Тоҷикистон дар Федератсияи Русия теъдоди шаҳрвандони ҷумҳурӣ ва вазъияти дастгиршудагонро муайян мекунанд.