Ҷамъомади тантанавӣ дар Китобхонаи миллӣ

Душанбе, 7 сентябр.( АМИТ «Ховар», Раъно Нусратуллоева).-Бахшида ба 22-юмин солгарди Истиқлолияти Ҷумҳурии Тоҷикистон ва ба ифтихори иди касбии китобдорон дар Китобхонаи миллии Тоҷикистон ҷамъомади тантанавӣ баргузор гардид. Дар ҷамъомад директори Китобхонаи миллӣ Носирҷон Салимов, мудири шуъбаи фарҳанги дастгоҳи иҷроияи Президенти Ҷумҳурии Тоҷикистон Маҳмадсаид Пиров сухан гуфта, ҳамаи кормандони китобхонаро бо ҷашни фархундаи Истиқлолияти миллӣ ва иди касбиашон табрик намуданд. Аз ҷумла, Маҳмадсаид Пиров зикр намуд, ки китоб дар рушди маънавиёту маърифати инсонӣ нақши асосӣ мебозад ва ин қасри бузурги фарҳанг аз бунёдкориҳои даврони Истиқлолият ва сиёсати фарҳангофарии Ҳукумати Тоҷикистон равшан гувоҳӣ медиҳад. Аз рӯи анъана ҳар сол бахшида ба ҷашни Истиқлолият ба шахсони беҳтарин мукофотҳои давлатӣ супорида мешаванд ва Маҳмадсаид Пиров аз номи Президенти мамлакат ба муовини аввали Китобхонаи миллӣ Саидҷаъфар Сафаров медали Хизмати шоистаро супурд. Роҳбарияти китобхона кормандони беҳтаринро, ки саҳми арзандаи худро дар соҳаи китобдорӣ гузоштаанд, бо ифтихорномаҳо сарфароз гардонид.