Ҷанг бо кордзанӣ анҷом ёфт

Душанбе, 11 сентябр. (АМИТ «Ховар», Л. Қосимова). — Тавре ки ба АМИТ «Ховар» аз Вазорати корҳои дохилаи ҶТ хабар доданд, ҳангоми гузаронидани чорабиниҳои фаврӣ-ҷустуҷӯӣ, аз ҷониби кормандони ШВКД дар ноҳияи И.Сомонӣ бо гумони даст доштан дар қасдан расонидани зарари ҷисмонӣ, ноболиғ Бобоев Хурсанд, сокини ноҳияи Варзоб дастгир карда шуд. Номбурда санаи 8 сентябри соли 2013, тахминан соати 14.00 дақиқа, дар ноҳияи Варзоб бо шаҳрвандон Салимов Фаррух, соли таваллудаш 1989 ва Исмоилов Сунатулло, соли таваллудаш 1992, сокинони ҳамин ноҳия ҷанг карда, бо корд ба шиками Салимов Ф. ва ба китфи чапи Исмоилов С. задааст. Дар натиҷа онҳо ҷароҳатҳои вазнин бардошта, дар беморхона бистарӣ гардидаанд.  Нисбат ба ҳодисаи мазкур парвандаи ҷиноӣ оғоз гардида, тафтиш идома дорад.