Ҷавонон бар зидди хариду фурӯши одамон

Душанбе, 19 сентябр. (АМИТ «Ховар», Л. Қосимова). — Дар доираи ҳамкориҳо бо шарикони иҷтимоӣ, бахусус ташкилоти байналмилалии меҳнат, бо ташаббуси гуруҳи байнисоҳавии корӣ оид ба пешгирии хариду фурӯши одамони назди Кумитаи ҷавонон, варзиш ва сайёҳӣ ва дастгирии комиссияи байниидоравии мубориза бар зидди хариду фурӯши одамон, ҷиҳати татбиқи «Барномаи маҷмӯии мубориза ба муқобили хариду фурӯши одамон дар Ҷумҳурии Тоҷикистон барои солҳои 2011-2013», дар шаш ноҳияи интихобӣ, аз қабили Данғара, Ҳамадонӣ, Шўрообод, Бохтар, Панҷ ва Ҳисор аз 16 то 22 сентябр суҳбату мулоқотҳо бо ҷавонон доир гашта истодаанд. Дар дораи мулоқотҳо мутахассисони масъулони вазорату идораҳои ҷавонон, варзиш ва сайёҳӣ, маориф, корҳои дорхилӣ, фарҳанг, телевизион ва радио, дин ва кор бо занон ва оила бо ҷавонони маҳалҳо суҳбатҳо баргузор карда, миёни ин табақа маводи иттилоотии фарогири мавзуъҳои мухталиф тақсим мекунанд. Тавре ки ба АМИТ «Ховар» аз бахши иттилоотии Кумитаи ҷавонон, варзиш ва сайёҳӣ хабар доданд, мақсад аз баргузории амалиёти маърифативу иттилоотӣ огоҳонидани шаҳрвандони ҷавон оид ба омилҳо ва сабабҳои пайдоиши хариду фурӯши одамон ва маърифатнок гардонидани онҳо дар роҳи мубориза ба муқобили хариду фурӯши одамон мебошад.Дар назар аст, ки дар чорабиниҳо беш аз 3500 ҷавонон ва 16000 шаҳрвандони навоҳии интихобӣ оид ба масоили марбут ба хариду фурӯши одамон маълумотнок гардонида, фаъолият дар ин самт пурзӯр карда мешавад.