Ба истифода додани Шўъбаи корҳои дохилӣ дар ноҳияи Тавилдара

Душанбе, 27 сентябр (АМИТ «Ховар»).- Дар доираи сафари кории худ ба ноҳияҳои минтақаи Рашт Президенти Ҷумҳурии Тоҷикистон Эмомалӣ Раҳмон ҳамчунин ба ноҳияи Тавилдара ташриф овард. Сарвари давлат Эмомалӣ Раҳмон нахуст дар маросими ба истифода супурдани бинои нави Шўъбаи корҳои дохилии ноҳияи Тавилдара иштирок намуда, бо буридани лентаи рамзӣ ба фаъолияти он расман оғоз бахшид. Бинои мазкур аз 2 ошёна ва таҳҳона иборат буда, дар он барои кормандони мақомоти дохилӣ шароити мусоиди фаъолият фароҳам оварда шудааст. Зимни шиносоӣ Сарвари давлат Эмомалӣ Раҳмон таъкид намуд, ки сол то сол шароити моддию техникии шўъбаҳои Вазорати корҳои дохилӣ дар шаҳру ноҳияҳои мамлакат беҳтар гардида, амали кардани ин тадбир барои фаъолияти пурсамари кормандони соҳа мусоидат мекунад. Дар рафти корҳои сохтмонии иншоооти мазкур то 30 нафар сокинони маҳаллӣ бо ҷойи кор таъмин гардиданд. Бинои нав дар маҷмуъ дорои 30 утоқи корӣ ва 1 маҷлисгоҳ буда, бо тарҳи муосири санъати меъморӣ бунёд ёфтааст.Президенти мамлакат ба кормандони мақомоти корҳои дохилӣ дастуру ҳидоят дод, ки дар иҷрои вазифаҳои хизматӣ садоқатмандона ва бо масъулияти баланд, фаъолият намоянд.