Чаро вакилони маҳаллаҳо каммасъулиятанд?

  Кӯлоб, 3 сентябр. (АМИТ «Ховар», С. Холов).-Корхонаи фаръии давлатии Хочагии коммуналии шаҳри Кӯлоб  баҳри тозагии муҳити зист, кӯчаҳою маҳаллаҳои шаҳр пайваста кӯшиш ба харҷ дода,  дар 7 моҳи соли ҷорӣ ба маблағи 42 ҳазору 4800 сомонӣ  ба аҳолӣ ва ташкилоту муассисаҳо хизмати коммуналӣ расонид. Директори корхонаи мазкур Абдухолиқ Лоиқов  аз аксари вакилони маҳаллаҳо ва роҳбарони ташкилоту муассисаҳо изҳори нигаронӣ карда, афзуд, ки  мутаассифона, дар кӯчаҳои марказии шаҳр  беш аз 53 адад   корхонаҳои хусусӣ  фаъолият дошта,  партовҳояшонро ба қуттиҳои  партобпартоӣ мепартоянд, лекин аз бастани шартнома ва пардохти ҳаққи хизмат  саркашӣ  менамоянд.  То ин муддат қарзи аҳолӣ аз корхона  ба 93 ҳазор сомонӣ расидааст, ки ин рақам нисбат ба соли сипаригардида қариб ду баробар зиёд мебошад.  Гуфта мешавад, ки масъулини корхона тасмим гирифтаанд  аз соли 2014-ум шартномаи  тарафайнро  байни ташкилоту муассиса ва аҳолӣ  ба куллӣ  тағйир  дода,   дар ин  самт ҳамкориро бо мақомоти ҳифзи ҳуқуқ  бештар намоянд.