Хатти оби нӯшокӣ барои 7 ҳазор аҳолӣ

 
           Душанбе, 3 сентябр. (АМИТ «Ховар» , Зарангези Латиф).- Раиси вилояти Суғд Қоҳир Расулзода зимни сафари корӣ ба шаҳри Истаравшан нахуст дар маросими ифтитоҳи хатти оби нӯшокӣ барои 7 ҳазор аҳолии деҳаҳои Боғикалон ва Сахсиёни ҷамоати Гули Сурх иштирок намуд. Қоҳир Расулзода ҳангоми мулоқот бо сокинони маҳал онҳоро ба муносибати фарорасии иди Истиқлолияти давлатии Ҷумҳурии Тоҷикистон табрик гуфта, аз ташаббусҳои созандаву бунёдкоронаи истаравшаниён изҳори хушнудӣ кард.
        Тавре ки аз хадамоти матбуоти Раиси вилояти Суғд иттилоъ доданд, барои аз маркази ҷамоат то деҳаҳои Боғикалон ва Сахсиён дар масофаи 2,5 километр баровардани оби нӯшокӣ 350 ҳазор сомонӣ масраф шудааст. Аз ин миқдор, дар заминаи муроҷиати сокинони ҷамоати мазкур, ки аз норасоии оби нӯшокӣ танқисӣ доштанд, 200 ҳазор сомонӣ  аз буҷаи вилоятӣ  ҷудо гардид. Иқдоми таъмини аҳолӣ бо оби нӯшокӣ аз ҷониби соҳибкорон низ хуш пазируфта шуда, сокинон ҳам ба тариқи ҳашар дар ин кори хайр саҳм гузоштаанд.