Ифтитоҳи галереяи нави фарҳангӣ дар Душанбе

Душанбе, 5 сентябр (АМИТ «Ховар»).- Дар ду толори ошёнаи якуми биноҳои Маҷмааи “Пойтахт-80” дар хиёбони Рӯдакии шаҳри Душанбе бо иштироки Сарвари давлат Эмомалӣ Раҳмон галереяи фарҳангӣ ифтитоҳ ёфт, ки барои намоишу фурӯши нақшу нигор ва мусаввараҳои рассомони маъруфи тоҷик ва ҳамчунин ороишоту туҳфаҳои хотиравӣ аз сангҳою маъданҳои ороишию гаронарзиш ва маҳсулоти ҳунарҳои зебои мардумӣ пешбинӣ шудааст.Дар як толори он, асосан маҳсули ҳунари волои рассомони номдори тоҷик ва ҳунарҳои мардумӣ, ки дар миёни сайёҳони хориҷӣ харидорони зиёд доранд, ба намоиш гузошта шудааст.Дар толори дуюм бошад, бештар маҳсулоти ширкати ватании Руҳом, ки асосан бо истеҳсоли ороишоти зебои туҳфавию хотиравӣ аз сангу маъданҳои кӯҳии ороишӣ ва гаронарзиш машғул аст, пешкаши мизоҷон гардидааст.Сарвари давлат Эмомалӣ Раҳмон ба маҳсули эҷоди рассомони ҷавону наврас, ки ба касбу ҳунари худ муҳаббати олӣ доранд, таваҷҷуҳи хос зоҳир намуда, онҳоро ба фатҳи қуллаҳои олӣ дар ин роҳи пурифтихор ҳидоят намуд.