Интихоби раиси Ҳисор ба вакилии Маҷлиси миллӣ

Душанбе, 14 сентябр. (АМИТ «Ховар»). — Имрӯз, 14 сентябри соли 2013 интихоботи аъзои Маҷлиси миллии Маҷлиси Олии Ҷумҳурии Тоҷикистон ба ивази аъзои хориҷшуда дар ҳавзаи интихоботии шаҳру ноҳияҳои тобеи ҷумҳурӣ №5 баргузор гардид.Тибқи талаботи моддаи 57 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» дар сурати пеш аз муҳлат катъ гардидани ваколати аъзои Маҷлиси миллӣ дар муддати се моҳи баъди қатъ гардидани ваколати онҳо интихоботи нав гузаронида мешавад. Аз ин рӯ, бо қарори КМИР интихоботи миёнадаврии аъзои Маҷлиси миллии Маҷлиси Олии Ҷумҳурии Тоҷикистон ба ивази аъзои хориҷшуда ба рӯзи 14 сентябри 2013 таъин гардида буд.Дар чорабинии мазкур 318 нафар вакилон аз маҷлисҳои вакилони халқи шаҳру ноҳияҳои тобеи ҷумҳурӣ ширкат варзиданд.Бояд хотиррасон намуд, ки бо қарори маҷлисҳои вакилони халқи ноҳияҳои Ҳисор ва Шаҳринав аз 3 августи соли 2013 ба аъзогии Маҷлиси миллии Маҷлиси Олӣ номзадии раиси ноҳияи Ҳисор Сабзов Усмон Раҳмонович пешбарӣ гардида буд.Пас аз овоздиҳӣ ва ҳисоб намудани бюллетенҳои интихобот аз тарафи комиссияи ҳавзавӣ муайян карда шуд, ки аз ҳавзаи интихоботии шаҳру ноҳияҳои тобеи ҷумҳурӣ №5 Сабзов Усмон Раҳмонович, узви Ҳизби Халқии Демократии Тоҷикистон (ҲХДТ), бо гирифтани аз нисф зиёди овозҳои вакилони интихобкунанда аъзои Маҷлиси миллии Маҷлиси Олии Ҷумҳурии Тоҷикистон интихоб шуд.