Истиқлолият — неъмати бебаҳои миллат

Душанбе, 5 сентябр. (АМИТ «Ховар», Л. Қосимова). — 4 сентябри соли равон дар Раёсати Вазорати корҳои дохилӣ дар нақлиёт бахшида ба 22-юмин солгарди Истиқлолияти давлатии Ҷумҳурии Тоҷикистон конфронси илмӣ-назариявӣ дар мавзӯи «Истиқлолият — неъмати бебаҳои миллат аст» баргузор гардид. Дар конфронс муовини вазири корҳои дохилӣ генерал-майори милитсия Навҷувонов А.Ш., вакили Маҷлиси Олии Ҷумҳурии Тоҷикистон, номзади илмҳои ҳуқуқ, мушовири давлатии адлияи дараҷаи 2-юм Имомом А.Х., сардори шуъбаи Прокуратураи нақлиётӣ Қаюмов С.А., муовини сардори Раёсати нозиротӣ-ташкилии Вазорати корҳои дохилӣ полковники милитсия Каримов Қ.Б., шунавандаҳои Академияи Вазорати корҳои дохилӣ, афсарон ва сарбозони Раёсати қӯшунҳои дохилӣ, ҳайати шахсии ноҳияи Шоҳмансур ва РВКДН иштирок намуданд. Сардори кафедраи «Фанҳои ҷамъиятӣ»-и Академияи ВКД, номзади илмҳои фалсафа, полковники милитсия Р.Ҷӯраев дар мавзӯи «Истиқлолияти сиёсӣ — асоси ташаккули давлатдории миллӣ» маърӯза намуд. Дар анҷом иштирокчиёни конфронс бо дастовардҳои илмии олимони Академияи ВКД дар намоишгоҳи толори «Роҳи оҳани Тоҷикистон» дидан намуданд. Дар ин бора ба АМИТ «Ховар» аз ВКД ҶТ хабар доданд.