Коммунистон номзади худро пешниҳод карданд

Душанбе, 23 сентябр. (АМИТ «Ховар», Руқияи Боймамад).- Имрўз дар шаҳри Душанбе анҷумани 30-юми Ҳизби коммунисти Тоҷикистон баргузор гардид. Дар анҷуман 86 вакил, намояндагони ВАО ва як зумра меҳмонон ҳузур доштанд. Дар анҷумани мазкур чанд масъала мавриди баррасӣ қарор гирифт. Шодӣ Шабдолов, раиси коммунистҳои Тоҷикистон дар анҷумани мазкур Исмоил Талбаковро ба ҳайси номзади арзанда муаррифӣ кард ва ҳамин тавр ба ӯ барои сабқат ва дарёфти курсии раёсати ҷумҳурӣ роҳи сафед хост. Ҳамчунин дар ҷараёни анҷуман, дар робита ба қазияи Сурия изҳорот қабул шуд, ки дар ин росто, Ҳизби коммунисти Тоҷикистон бо қабули ин санад пуштибонии худро аз талошҳои Русия барои ҳалли мусолиматомези қазияи Сурия баён кард. Гуфтан бамаврид аст, ки Ҳизби коммунисти Тоҷикистон то кунун дар интихоботҳои президентӣ ва порлумонии Тоҷикистон бо пешбарии номзадҳояш ширкат кардааст.