Кормандони Вазорати меҳнат соҳиби мукофот гардиданд

Душанбе, 11 сентябр. (АМИТ «Ховар», Л. Қосимова). — Бахшида ба 22 — солагии Истиқлолияти давлатии Ҷумҳурии Тоҷикистон дар Вазорати меҳнат ва ҳифзи иҷтимоии аҳолии Ҷумҳурии Тоҷикистон маҷлиси тантанавӣ баргузор гардид, ки дар он роҳбарияти вазорат ва кормандони дастгоҳи марказӣ ва сохторҳои системаи он иштирок намуданд. Вазири меҳнат ва ҳифзи иҷтимоии аҳолии Ҷумҳурии Тоҷикистон Маҳмадамин Маҳмадаминов оид ба дастовардҳои истиқлолият дар 22 сол сухан гуфта, 5 нафар кормандро бо нишони сарисинагии «Аълочии соҳаи меҳнат ва ҳифзи иҷтимоӣ», 29 нафарро бо «Ифтихорнома»-и вазорат сарфароз гардонид. Инчунин ба 16 нафар кормандони вазорат ва сохторҳои системаи он барои иштирок дар чорабиниҳо оид ба омодагӣ ва қабули меҳмонони «Конфронси байналмилалии сатҳи баланд оид ба ҳамкорӣ дар соҳаи об» раҳматнома эълон шуд. Дар чорабинӣ мудири шуъбаи шуғл ва ҳифзи иҷтимоии аҳолии дастгоҳи иҷроияи Президенти Ҷумҳурии Тоҷикистон А. Ёрбобоев ҳозиринро ба ифтихори ин ҷашн табрик намуд. Дар ин бора ба АМИТ «Ховар» аз дафтари матбуоти Вазорати меҳнат ва ҳифзи иҷтимоии аҳолии ҶТ хабар доданд.