Маросими қасамёдкунии 250 нафар афсарони ҷавон

Душанбе, 20 сентябр. (АМИТ «Ховар», Лутфия Эшонқулова).-Маросими тантанавии қасамёдкунии ҳайати қаторӣ ва афсарони ҷузъу томҳои ВКД ва курсантони Академияи Вазорати корҳои дохилӣ дирӯз дар Душанбе баргузор гардид.Дар маросими бошукуҳ вазири корҳои дохилии Ҷумҳурии Тоҷикистон Рамазон Раҳимов, роҳбарияти раёсатҳо, собиқадорон, ҳайати шахсии ВКД, падару модарон ва наздикони шунавандаҳо ва дигар шахсони расмӣ иштирок намуданд.Нахуст роҳбарияти Вазорати корҳои дохилӣ ва собиқадорони мақомот дар назди Маҷмааи ёдгорӣ ба хотири қурбониёни роҳи озодӣ ва онҳое, ки дар барқарор намудани сохти конститутсионӣ ҷони худро қурбон намудаанд, гулчанбар гузоштанд. Рамазон Раҳимов ба қасамёдкунандагон садоқату матонат ва дар хизмати душвору пуршарафашон барору комёбиҳо таманно намуда, ба падару модарон ва наздикони кормандони ҷавони милитсия ҳамсуҳбат шуда, хитоб намуд, ки «Корманди Вазорати корҳои дохилӣ будан шараф аст! Танҳо аз Шумо хоҳиш менамоем, ки бо мақомоти корҳои дохилӣ ҳамкорӣ намоед ва аз ҳолу аҳволи фарзандонатон бохабар шавед ва онҳоро беназорат нагузоред, зеро ин мақомотест, ки дар он тартибу низом ва одобу ахлоқ дар ҷойи аввал меистад». Мавсуф ҳамчунин илова намуд, ки «Мо итминони комил дорем, ки ин хизматчиёни мақомоти корҳои дохилӣ ба савганди худ содиқ монда, ба халқу Ватани азизи худ софдилона хизмат хоҳанд кард».Сипас курсантони ҷавон бо гузашти тантанавӣ ва бо як маҳорату малака ва чолокии хосса дар зери мусиқии мутантани оркестр ба иҷрои машқи идона пардохта, хотири ҳозиринро шод гардониданд. Мавриди зикр аст, ки дар маросим 250 нафар афсарони ҷавон, ки аз ин 122 нафарашонро шунавандагони Академияи ВКД, аз ҷумла, 20 нафар духтарон ташкил медоданд, ботантана қасам ёд карданд.