Муносиботи Душанбеву Париж ба сатҳи нав бароварда хоҳад шуд

 
             Душанбе, 3 сентябр.(АМИТ «Ховар», Марзия Саидова).- «Байни  Тоҷикистону Фаронса ҳоло имкониятҳои истифода нашуда хеле зиёданд». Ин матлабро Шукурҷон Зуҳуров -раиси Маҷлиси намояндагони Маҷлиси Олии Ҷумҳурии Тоҷикистон  дар мулоқоташ бо ҳайати cенаторони  Фаронса, ки бо роҳбарии Андре Дюле — раиси гуруҳи ҳамкориҳои байнипарлумонии дӯстии  Фаронса ва Осиёи Марказӣ ба Тоҷикистон омадаанд, иброз дошт.
               Мусоҳибон тавсеаи ҳамкориҳои тарафайн дар бахшҳои мухталифро аз масъалаҳои муҳими мулоқоти имрӯза арзёбӣ намуда, изҳор доштанд, ки ҳарду кишвар шароити мусоидро барои таҳкими муносиботи гуногунсоҳаи байниҳамдигариро дар кишварҳои худ ба вуҷуд овардаанд. Таваҷҷуҳи зиёд ба масоили ҳамкорӣ дар бахши сиёсат ва амнияти минтақавӣ, иқтисод ва тиҷорат, сармоягузорӣ, обу энергетика ва экология зоҳир карда шуд. Шукурҷон Зуҳуров сатҳи равобити Тоҷикистон ва Фаронсаро қанотбахш арзёбӣ намуда, гуфт, ки ҳар ду кишвар бояд барои тақвияти муносиботи дуҷонибаю бисёрҷониба ва дар доираи созмонҳои байналмилалӣ талош намоянд. Раиси палатаи поёнии Парлумони Тоҷикистон ҳамкориҳои сиёсии Тоҷикистону Фаронсаро омили аслии рушди дигар соҳаҳо унвон кард. Мавсуф гуфт, ки дар таърихи муносиботи ду кишвар 12 санади ҳамкорӣ ба имзо расидааст, ки пояи қарордодиву ҳуқуқии ҳамкорӣ байни Тоҷикистон ва Фаронсаро ба танзим медароранд. Барои ба сатҳи нав баровардани муносиботи Тоҷикистон ва кишварҳои Иттиҳоди Аврупо, хусусан Фаронса эътибор пайдо кардани санади бунёдӣ — Созишномаи ширкат ва ҳамкорӣ — нақши муҳим хоҳад бозид.     Зикр шуд, ки Тоҷикистон метавонад бо Фаронса дар соҳаи гидроэнергетика, электротехника, кишоварзӣ, хусусан таъсиси корхонаҳои муштараки коркарди мева, сабзавот, коркарди захираҳои маъуднӣ, туризм ва атриёт ҳамкории судмандро ба роҳ монад.  
 Сенатори Фаронса Андре Дюле гуфт, ки ба ҳайси вакили  Сенат аз тамоми имконот барои боз ҳам тақвият ёфтани равобити дуҷонибаи Париж ва Душанбе истифода хоҳад кард. Гуфтугӯйи судманд ҳамчунин дар самти тавсеаи робитаҳои байнипарлумонӣ сурат гирифт.