Натиҷаҳои АНМН дар ҳафтаи гузашта

Душанбе, 11 сентябр. (АМИТ «Ховар», Л. Қосимова). — Тавре ки аз дафтари матбуоти Агентии назорати маводи нашъаовари назди Президенти Ҷумҳурии Тоҷикистон (АНМН) ба АМИТ «Ховар» хабар доданд, кормандони агентӣ дар доираи амалиёти ҷумҳуриявии «Кӯкнор-2013» роҳи интиқоли маводи нашъадорро аз Афғонистон ба Тоҷикистон баста, шаҳрванди ҷумҳурӣ, ки дар кофтукови байнидавлатӣ қарор дошт, дастгир намуда, растаниҳои бангдонаи худрӯйро нобуд карданд. Дар ҷараёни гузаронидани амалиёт аз муомилоти ғайриқонунӣ қариб 30 кг маводи нашъадор, аз ҷумла 3 кг ҳашиш, 26 кг каннабис мусодира шуда, 200 бех растаниҳои худрӯйи бангдона нобуд карда шуданд. Дар маҷмуъ барои содир намудани ҷиноятҳои мазкур 3 нафар дастгир шуд, ки 1 нафар аз онҳо пештар барои содир намудани ҷиноятҳои мухаддиротӣ дар кофтуков қарор дошт. Кормандони фаврии АНМН бо истифода аз саги хизматӣ барои пешгирии воридшавии маводи мухаддир ба ҷумҳурӣ гузаргоҳҳои тахминии қочоқчиёнро дар ноҳияи Ишкошими ВМКБ аз назар гузарониданд. Дар натиҷа дар ҳудуди деҳаи Шанбедеҳ, наздикии дарёи Панҷ як паноҳгоҳ ошкор гардид, ки аз дохили он халтаи полиэтиленӣ ва пакети селофанӣ бо маводи растанимонанди бӯи махсус дошта дарёфт ва мусодира шуд. Мутахассисони шуъбаи ташхиси судии РАНМН дар вилояти Мухтори Куҳистони Бадахшон муайян карданд, ки маводи мусодирашуда каннабис ва ҳашиш мебошанд. Дар натиҷаи чорабиниҳои фаврию ҷустуҷӯӣ кормандони агентӣ шаҳрванди ҷумҳурӣ Анвар Юсуфалиев, зодаи деҳаи Боғистони ноҳияи Шаҳринавро, ки барои содир намудани ҷиноятҳои мухаддиротӣ дар кофтукови байнидавлатӣ қарор дошт, дастгир намуданд.