Раддияи МТС назди Президенти ҶТ

Душанбе, 11 сентябр. (АМИТ «Ховар»).-9 сентябри соли 2013 дар сомонаи (сайти) «ЦентрАзия» таҳти унвони «Исломишавии Осиёи Марказӣ чун омили равандҳои ҷаҳонии геополитикӣ» мақолае ба нашр расид. Муаллифи ин мақола Саттор Мирзо зикр гардидааст ва гӯё ки мушовири Маркази тадқиқоти стратегии назди Президенти Ҷумҳурии Тоҷикистон мебошад. Дар ин робита, ба маълумоти хонандагони гиромӣ мерасонем, ки чунин шахс корманди Маркази тадқиқоти стратегии назди Президенти ҶТ нест ва Маркази тадқиқоти стратегии назди Президенти ҶТ ба таҳияи мақолаи мазкур ҳеҷ гуна алоқае надорад. Мо ҳамаи далелҳои дар мақола овардаи ин муаллифро беасос мешуморем ва бо нуқтаи назари муаллиф мувофиқ нестем. Дар бораи шахсияти муаллиф низ маълумоте надорем. Ва умуман бо чунин ном дар Точикистон на рӯзноманигоре ва на олиме фаъолият намекунад. Ин кори душманони миллати точик мебошад, ки онҳо мехоҳанд фазои сиёсии Тоҷикистони азизро ноором нишон диҳанд ва бо ин роҳ ба имиҷи Тоҷикистон латма ворид намоянд,-таъкид шудааст дар раддияи Маркази матбуоти МТС назди Президент Ҷумҳурии Тоҷикистон.