Рушди инклюзивӣ (фарогир) дар Тоҷикистон

Душанбе, 30 сентябр. (АМИТ «Ховар», Кристина Эрлих). – Чанде пеш дар шаҳри Ню – Йорки ИМА мизи мудаввари «Ҳамкорию мушорикати байналмилалию минтақавӣ ба нафъи маъюбон: Рушди инклюзивӣ» баргузор гардид. Назар ба хабари намояндаи Вазорати меҳнат ва ҳифзи иҷтимоии аҳолии ҶТ, роҳбарии ҳайати Тоҷикистонро Вазири меҳнат ва ҳифзи иҷтимоии аҳолии ҶТ Маҳмадамин Маҳмадаминов ба ӯҳда дошт. Маҳмадамин Маҳмадаминов зимни суханрониаш зикр намуд, ки Ҳукумати Тоҷикистон барои фароҳам овардани вазъияти мусоиди сармоягузорӣ, пиёда намудани сиёсати бахши буҷа, рушду густариши иқтисодиёт ва таъмини шуғли аҳолӣ чораҳои зарурӣ мебинад. Дар натиҷаи ин солҳои охир муяссар шуд, ки сатҳи камбизоатӣ дар кишвар ба куллӣ коҳиш дода шавад. Вазир иброз дошт, ки дар кишвар заминаи мусоиди ҳуқуқӣ фароҳам оварда шудааст, ки таҳкурсии ҳуқуқӣ ва иқтисодию ташкилии ҳифзи иҷтимоии маъюбон, барои онҳо фароҳам овардани имконияти баробар ҷиҳати фаъолияти пурсамар дар ҷамъиятро мегузорад.Мувофиқи суханони Маҳмадамин Маҳмадаминов, тайи солҳои охир ҳамкорӣ бо мададгорон, созмонҳои байналмилалию минтақавӣ, ҳамчунин бо созмонҳои мухталифи ғайриҳукуматӣ ба манзури эъмори ҷомеаи кушода ва дастрасу баробарҳуқуқ барои маъюбон хеле вусъат дода шуд. Зимни ҳамкорӣ бо Бонки умумиҷаҳонӣ, Иттиҳоди Аврупо, Бонки рушди Осиё ва бархе кишварҳо ислоҳоти ҳамаи соҳаҳои ҳифзи иҷтимоии мардуми кишвар ҷиҳати бунёди ҷомеаи инклюзивӣ ва таъмини имкониятҳои гуногун барои маъюбон сурат мегирад.Вазир дар хотима зикр намуд, ки рушди инклюзивӣ ва бунёди ҷомеаи кушода ва дастрасу баробарҳуқуқ барои маъюбон фақат бо роҳи рушду густариш бахшидани ҳамкории байналмилалию минтақавӣ, ҳамчунин мушорикати фаъоли иҷтимоии ҳамаи ҷонибҳои манфиатдор имконпазир аст.