Сафари гуруҳи нахустини зоирон ба Арабистони Саудӣ

Душанбе, 21 сентябр. (АМИТ «Ховар», Зарангези Латиф). — Парвози гуруҳи нахустини зоирин имрӯз соати 6-и субҳ тариқи ширкати ҳавопаймоии «Тоҷик Эйр» дар доираи барномаи давлатии «Ҳаҷ — 2013» ба шаҳрҳои муқаддаси мусалмонон шуруъ намуд. Парвозҳо аз шаҳри Душанбе ба самти Арабистони Саудӣ дар ҳавопаймои Боинг 757-200 иҷро гардида, нахустин гуруҳи зоирин иборат аз 210 нафар аз «Фурудгоҳи байналмилалии Душанбе» ба шаҳри Мадина оғоз шуданд. Ёдрас мешавем, ки ҶСК «Тоҷик Эйр» тибқи муқаррарот аз 21-уми сентябр то 1-уми октябри соли равон бо иҷрои 13 парвоз қисме аз зоиринро ба шаҳри Мадина, қисмати дигарро ба шаҳри Ҷидда интиқол дода, аз санаи 19-уми октябр то 2-юми ноябр бо иҷрои 13 парвози дигар ҳоҷиёни Тоҷикистонро ба ватан бармегардонад. Дар ин бора ба АМИТ «Ховар» аз дафтари матбуоти ҶСК «Тоҷик Эйр» хабар доданд.