Шукргузорӣ аз Истиқлолият

Душанбе, 6 сентябр. (АМИТ «Ховар», Назир Назиров).-Рўзи 6-уми сентябри соли ҷорӣ дар Кумитаи ҳифзи муҳити зисти назди Ҳукумати Ҷумҳурии Тоҷикистон бахшида ба 22-юмин солгарди Истиқлолияти давлатии Ҷумҳурии Тоҷикистон, ҷамъомади тантанавӣ доир шуд. Дар он муовини Сарвазир Муродалӣ Алимардон ширкат намуда, ба кормандони кумита ва сохторҳои тобеи он табрикоти Сарвари давлатро расонид.  Бояд зикр намуд, ки солҳои охир бо ҳидояти Ҳукумати ҷумҳурӣ Кумитаи ҳифзи муҳити зисти назди Ҳукумати Ҷумҳурии Тоҷикистон, бо назардошти буҳрони ҷаҳонии таназзулёбии муҳити зист ва масоили вобаста ба он тадбирҳои қобили дастгириро меандешад. Табиист, ки дар ин миён аз мушкилоти ҷойдошта масъалаи баланд бардоштани маърифати экологии аҳолӣ низ яке аз ин проблемаҳои рўзмаррае мебошад, ки кумита, баҳри дар амал татбиқ намудани қонунҳои Ҷумҳурии Тоҷикистон «Дар бораи маърифати экологии аҳолӣ» ва «Дар бораи иттилооти экологӣ» пайваста талош менамояд. Имсол мисли солҳои қаблӣ бо Фармоиши раиси кумита оид ба ташкил ва гузарондани озмуни ҷумҳуриявӣ байни кормандони ВАО, барои маводи беҳтарини вобаста ба муҳити зист дар мавзӯи «Тамаддун ва муҳити зист» озмун эълон шуд. Бояд ёдовар шуд, ки ин озмун ҳамчунин ба Конфронси байналмилалии «Соли 2013-соли байналмилалии ҳамкориҳо дар соҳаи об», ки он моҳи қаблӣ дар пойтахти Ҷумҳурии Тоҷикистон- шаҳри Душанбе бо иштироки намояндагони созмонҳои байналмилалӣ доир шуд, низ робита дошт. Ҳайати комиссияи озмун дар арафаи солгарди Истиқлолияти давлатӣ ғолибонро муайян намуда, дар рўзи ҳамоиши идона онҳо бо туҳфаҳои пулӣ ва Ифтихорномаҳои Кумитаи ҳифзи муҳити зисти назди Ҳукумати Ҷумҳурии Тоҷикистон сарфароз гардонида шуданд.