Сохтмони 4 корхонаи маводи сохтмон то охири сол

Душанбе, 11 сентябр. (АМИТ «Ховар», Зарангези Латиф).- Мувофиқи Қарори Ҳукумати Ҷумҳурии Тоҷикистон «Дар бораи тасдиқи Нақшаи амал оид ба таъсисёбии корхонаҳои саноатӣ дар Ҷумҳурии Тоҷикистон барои солҳои 2012-2013» дар соҳаи масолеҳи сохтмони соли 2013-ум ба истифода додани 23 корхонаи хурду миёна пешбинӣ шудааст. Аз ин миқдор дар зарфи 8 моҳ 20 корхона бо таъсиси 627 ҷойи корӣ мавриди баҳрабардорӣ қарор дода шуд. Тавре ки аз Вазорати энергетика ва саноати ҷумҳурӣ иттилоъ доданд, корхонаҳои нави истеҳсоли семент дар ноҳияи Ёвон ва шаҳри Конибодом, истеҳсоли хишт дар ноҳияҳои Спитамен, Ваҳдат, Ҷилликўл, Мастчоҳ, Турсунзода, Рўдакӣ, Сарбанд, қуму шағал дар ноҳияҳои Шўрообод, Фархор, Хуросон, Рўдакӣ, Ҳисор, шаҳри Ваҳдат ба истифода дода шуданд.Дар айни замон сохтмони 4 корхонаи дигар идома дошта, он то охири сол фаъол гардонида мешавад.