Супоридани мукофотҳои давлатӣ ба маорифчиён

Душанбе, 4 сентябр.(АМИТ «Ховар», Раъно Нусратуллоева).-Бахшида ба 22-юмин солгарди ҷашни Истиқлолияти Ҷумҳурии Тоҷикистон як гуруҳ ходимони соҳаи маориф бо мукофотҳои давлатӣ сарфароз гардонида шуданд. Дар ҷамъомад вазири маорифи Ҷумҳурии Тоҷикистон Нуриддин Саидов, мушовири Президенти Ҷумҳурии Тоҷикистон Умриддин Юсуфов сухан гуфта, аз номи Президенти Ҷумҳурии Тоҷикистон ҳамаи шахсони арзандаеро, ки дар соҳаи маориф хизматҳои назаррас кардаанд, табрик намуда, мукофотҳои давлатиро супурданд. Аз ҷумла зикр гардид, ки соҳаи маориф сол аз сол рушд ёфта, соҳаи асосӣ ва афзалиятноки сиёсати давлатии Ҷумҳурии Тоҷикистон мебошад ва он пояи муҳимтарини давлатдории миллӣ, омили таъминкунандаи рушди устувори давлат ва шарти асосии пешрафти ҷомеа ба ҳисоб меравад.